بسم الله الرحمن الرحيم
من وحي النبوة
أدعية النبي داود
1
الصراط المستقيم
هنيا لهم اللي ما يتبعوا مشورة الأشرار،
ولا يمشوا في طريق الفجار،
ولا بيقعدوا مع المستهزئين بالأبرار.
هم اللي رضا قلوبهم في شرع الله،
وبيتأملوا في كلمات ربهم ليل ونهار.
فهم زي شجرة مغروسة عند مجرىَ النهر،
مش بيذبل ورقها، وبتطلع ثمارها في أوانها،
وبينجحوا في كل أعمالهم.
على غير الحال يكون الأشرار،
فهم زي القش اللي بترميه الريح.
مفيش مهرب لهم من الحساب يوم الدين،
ومش حيكون لهم مكان مع الصالحين.
فالله بيحفظ طريق الصالحين،
وللهلاك بيوصل طريق الفاسدين.
الصراط المستقيم (معدل 1)
أللهم بارك اللي ما يتبعو مشورة الأشرار،
واللي ما يمشو في طريق الفجار،
واللي ما يقعدوا مع اللي بيستهزءوا بالأبرار.
أللهم بارك اللي ترضَى قلوبهم بشريعتك،
واللي بيتأملوا ليل ونهار في كلمتك.
أللهم بارك لهم في كل اللي بيعملوه،
وأجعلهم زي شجرة مغروسة عند مجرىَ النهر
ما بيذبل وراقها، وبتطلع ثمرها في وقتها.
أللهم أكفنا مشورة الفاسدين،
لأن عملهم زي القش اللي طيره الريح.
أللهم نزل قضائك على المفسدين،
يوم ما تفصل بين الخطاة والصالحين.
يا رب أنت بتهلك أللي بيتبع طريق الأشرار،
فأحفظ برحمتك أللي أتبعك من الأبرار.
الشجرة الطيبة (مُعدل2)
يا رب ما تجعلني أمشي ورا مشورة الأشرار،
وابعدني عن طريق الفجار،
واحميني من المستهزئين بالأبرار.
يا رب خلي رضا نفسي في شريعتك،
وخليني اتفكر ليل ونهار في كلمتِكَ.
يا رب وفقني وأصلح لي عملي،
واجعلني زي شجرة مغروسة على ضفافِ الأنهار،
ما يذبل وراقها، وبتطلع ثمرها في وقتها.
أللهم أكفني مشورة الفاسدين،
فعملهم زي القش أللي طيرته الريح.
أللهم نزل حكمك على المفسدين،
يوم ما تفصل بين الخطاة والصالحين.
يا رب أنت بتهلك أللي بيتبع طريق الأشرار،
فأحفظني برحمتك وأجعلني من الأبرار.
2
الملك المختار من الله
يا رب، ليه بتتمرد أمم الدنيا؟ وليه بالباطل بيدبر الناس؟
ملوك الأرض اتحالفوا ضد الله والملك اللي أختاره.
وقالوا: «خلينا نتحرر من سلطة الله والملك اللي أختاره،
ونكسر قيدهم عننا».
لكن الله في السماء بيستهزئ بهم من فوق عرشه.
وغضبه بيحل عليهم وينزل الرعب في قلوبهم، وينذرهم،
ويقول لهم: «أنا اللي توجت الملك
اللي أخترته وقعدته على العرش في جبل القدس».
يا رب، أنا بعلن كلامك اللي ذكرته في كتابك لما قلت لي:
«النهاردة أنا تبنيتك وتوجتك علشان تكون أبني.
أطلب مني وأنا أوهب لك كل أمم الأرض.
فتحكمها بيد من حديد، وتكسرها زي أواني الفخار».
فيا ملوك الأرض أتصرفوا بحكمة، وأحذروا أيها الحكام.
أعبدوا الله بتقوى وأخضعوا له وأنتم راضيين.
واقبلوا الملك المختار، وإلا يغضب الله عليكم ويهلككم.
لكن الله بيحفظ ويبارك كل اللي بيلجأ إليه.
3
علىَ الله توكلت
دعىَ النبي داود بالدعاء ده لما ربنا إبتلاه وأبنه أبشالوم تمرد عليه، فأضطر النبي داود أنه يهرب منه.
يا رب عم البلاء وزادوا اللي بيحاصروني من الأعداء.
وبيقولوا لي: "إلهك مش حينجيك من الفناء".
لكن يا رب أنت حصني،
بتنصرني وبترفع رأسي في العلياء.
بأستغيث بك يا رب من شدة الإبتلاء،
فاستجيب لي من عليائك يا رب السماء.
أنام وأصحى وأنا معاك في أمان،
لأنك بتحميني يا رب السماء.
معاك يا رب مخافش إن كثر من حوليا الأعداء،
ولا لو أجتمع على قتلي الغُرَماء.
أنجدني يا رب وبدل بالنصر هزيمتي،
وأكسر عني شوكة الأعداء.
يا رب نجي حياتي،
وباركنا يا سميع الدعاء.
علىَ الله توكلت (معدل 1)
يا رب أشكو إليك كثر اللي عايزين أذيتي.
بيقولوا أن ربي مش قادر على نجدتي.
لكن يا رب أنت حصني، تنصرني وترفع هامتي.
يا رب أستغثت بك، فمن عليائِكَ سمعتَ دعوتي.
أنام وأصحى مطمئن، لأنك يا رب بتحفظ روعتي./ تؤمن رهبتي
مخافش من كثرة أعدائي، لأن منك يا رب حمايتي.
يا رب أكسر شوكة أعدائي، وبدل بالنصر هزيمتي.
فأحسن إلينا يا رب، ويا لطيف نجي حياتي.
4
يا سامع دعوتي
اللهم أسمع برحمتك دعوتي، وفرج عني يا رب ضيقتي.
اللهم أكفيني شر اللي بتكلم بالسوء عني، وأحفظ من كلام الباطل كرامتي.
يا رب أنت بتختار أوليائك حسب مشيئتك، ولما بأدعي لك بتستجيب دعوتي.
اللهم نزل خشيتك في قلب أعدائي، فيتفكروا ويتراجعوا عن أذيتي.
اللهم أجعلهم يتوكلوا عليك، ويعبدوك حق عبادتك.
يا رب كثير بيشُكوا ويقولوا: «مفيش حد بيحسن إلينا» فأشرق يا رب بنور وجهك علينا.
يا رب طمئن قلبي بفرحة تغنيني عن كل خيرات الدنيا.
يا رب خلي السلام يحل في بيتي، وأطمئن في صحوي وغَفلَتي.
يا سامع دعوتي (معدل)
اللهم أسمع برحمتك دعوتي، وفرج عني يا رب ضيقتي.
يا رب لحد امتى يدنس الناس مجدي، وبالباطل يتهموني، ويلطخو كرامتي؟
فيا رب عرفهم أنك بتختار أوليائك حسب مشيئتك، وأني لما بادعيلك بتستجيب دعوتي.
اللهم أجعلهم يخشوك وميغلطوش في غضبهم، واجعلهم يتفحصوا قلوبهم ويتفكروا في نفوسهم.
اللهم أجعل أضحياتهم مقبولة عندك، وأجعلهم من المتوكلين عليك.
يا رب كثير بيشُكوا ويقولوا: «مفيش حد بيحسن إلينا» فأشرق يا رب بنور وجهك علينا.
يا رب طمئن قلبي بفرحة تغنيني عن كل خيرات الدنيا.
يا رب، أنام وأصحى وأنا مطمئن، فأنت وحدك بتحفظني وبتخلي السلام يحل في بيتي.
5
ربي أهدني الصراط المستقيم
يا رب أسمع دعوتي،
فأنت المطلع على شكوتي.
يا مالك الملك أصغي لصرختي،
لوجهك الكريم بأرفع دعوتي.
في الفجر تسمع صوتي لما أدعي لك،
وبالنهار أنتظر واترجَى رحمتك.
يا رب أنت القدوس والشر ما يرضيكَ،
والأشرار ميقدروش يقفوا بين أيديك.
يا رب أنت بتكره الفاحشين،
وميقدرش يقف في حضرتك المتكبرين.
يا رب أنت بتهلك الكذابين،
وبتكره اللي بيسفكوا الدم القاتلين.
أما أنا فبرحمة منك بأدخل بيتك،
وبأسجد لك بخشوع في قدس حضرتك.
ربي أهدني الصراط المستقيم،
وأيدني بنصرك وإن كثر المعتدين،
اللهم أحفظني من أعداء كذابين،
وأكفيني ألسنة خبيثة ونفوس الحاقدين.
يا رب أقضي بحكمك فيهم لأنهم تمردوا عليك،
واجعلهم في مكرهِم ساقطين.
فأنت يا رب مش بتخيب اللي بيلجأ ليك،
وبتفرح بكرمِك الشاكرين.
فيا رب نعمتك بتكفي الصالحين،
ورحمتك بتحوطهم زي الحصن المتين.
6
اللهم أرحم قلة حيلتي
اللهم أني أعوذ بك من أن يحلَ عليَّ غضبَك أو ينزل بيَّ سخطَك.
يا رب أرحم قلة حيلتي،
وعافيني من ضعف قوتي.
يا رب أنا مفزوع والقلق غلبني،
فلحد أمتى يا رب يفضل كده حالي؟
يا رب خليك قريب مني وأنجدني،
وأرحمني برحمتك زي ما وعدتني.
يا رب نجنيي فمتغفلش عن ذكرك نفسي،
فلو ماتت النفس أزاي أدعي لك وتستجيب لي.
يا رب تعبت ومن شدة همي طال ليلي،
ودموعي غرقت فراشي من شدة حزني.
من كيد عدوي ضعف بصري،
ومن شدة همي كلت عيني.
يا رب أنت القريب وبتسمع همسي،
فاكفيني الفاسدين وأبعدهم بعيد عني.
يا رب رُد عني كيد اللي عايز يؤذيني،
واخزي عدوي وبرحمتِكَ أنصرني.
يا رب أنت سمعت شكوتي،
وأنا واثق أنك تقبلت دعوتي.
7
الله هو الحكم العدل
يا رب إليك لجأت وأنت حصني
فنجيني وأحفظني مْن كل اللي بيطاردني
وإلا نهشوا زي الأسود لحمي،
ومنك وحدك يا رب نجدتي
يا رب أنا بريء.
فإن كنت خنت أو غدرت،
أو أرتكبت ظلم بإيدي،
فخلي عدوي يلحقني،
ويُمرغ في التراب رأسي.
يا رب أظهر لهم غضبك،
وأرفع على عدوي إيد عدلك
كل الأمم بتجتمع بين يديك
فتحاسبهم بالحق من فوق عرشك
يا رب أنت الديان
فبحسب أمانتي أظهر برائتي
يا رب أنت العليم بذات الصدور
فانزع شر الفاسدين وثبت الصالحين بنصرك.
يا رب أنت حصني وملجأي،
وأنت اللي بتحفظ الأبرار بسترك.
يا رب أنت الحَكَم العدل،
بتحاسب الأشرار وماضي فيهم حكمك.
اللي يعصى ويستكبر، بترفع عليه سيف غضبك،
ومفيش عاصم له من رمية قوسك.
جهزت لهم سلاحك،
وأشعلت لهم سهام سخطك.
يا رب، الشرير بيدبر الشر
وبيَحمل الإثم وبيولد الباطل
حفر الشرير حفرة وعمقها
فسقط بخبث نفسه فيها
الشر بينقلب على اللي بيعمله
وظلم الظالم بيقع على راسه
يا رب لك الحمد على عدلك،
وأرنم بأسمك وأسبح بحمدك.
8
يا رب ما أعظم أسمك!
يا رب لك الملك، في السما جل جلالك، وفي كل الأرض المجد لأسمك.
بتسبيح الأطفال والرضع أسست حصنك، علشان تخرس خصمك وكل اللي يعارضك.
يا رب، لما بتأمل في السما اللي خلقتها بإيدك،
والقمر والنجوم اللي سخرتها بقدرتك،
بقول في نفسي: مين يكون الإنسان علشان تهتم بأمره؟ وأيه قيمته علشان تعتني بضعفه؟
فأنت جعلت خلقته أقل بشوية من ملائكتك، وبالمجد والكرامة توجته.
وسخرت له كل شيء تحت سلطته، وجعلته والي على كل اللي خلقته بإيدك،
من البهائم والوحوش والأغنام،
والطيور في السما، والأسماك في البحر وكل حيوان بيعيش في المياة.
يا ربنا ومولانا، في كل الكون ما أعظم أسمك!
9
أنت يا رب لا تنسى المساكين / يا رب من كل قلبي أسبح بحمدك
يا رب من كل قلبي أسبح بحمدك، وأعلن عجائب قدرتك.
بك أرضى وأفرح يا ربي العلي وأسبح باسمك.
أعدائي يتراجعوا وبيسقطوا قدامك.
لأنك يا رب تقضي بالحق من فوق عرشك، وحكمت لي فبرائتي بعدلك.
أنذرت الأمم العاصية وأهلكت الأشرار، ومسحت للأبد أسمهم.
هزمت الأعداء تمامًا وأفنيتهم، دمرت مدنهم ومحيت ذكرهم.
يا رب أنت الملك وللأبد يمتد ملكك، وحكمك ثابت من فوق عرشك.
تقضي بين كل الناس بالحق، وأنت العدل في حكمك.
يا رب أنت الحصن في وقت الضيق، وأنت الملجأ للمظلومين.
بيتوكل عليك اللي بيمجدوا أسمك، وأنت يا رب مش بتخيب المتوكلين.
أللهم أجعل المؤمنين بك يسبحوا باسمك،
ويعلنوا بين كل الأمم العاصية عن عجائب قدرتك.
فأنت يا رب مش بتهمل سافك الدم لحد ما تنتقم منه، ولا بتتجاهل أبدًا صرخة المساكين.
يا رب أرحمني وشوف ذلي من اللي بيكرهني، ومن هاوية الموت أنقذني.
قدام كل أهل القدس بسبح بحمدك، وترضى نفسي بنجدتِك.
يا رب، سقطت الأمم العاصية في الحفرة اللي حفروها،
وزلت رجليهم في الفخاخ اللي نصبوها.
وأنت يا رب بتكشف عن عدلك، فيقع الأشرار في شرهم ومش بيفلتوا من حكمك.
يا رب الأشرار بيسقطوا في هاوية الموت، مع كل الأمم اللي نستك وتمردت عليك.
وأنت يا رب مش بتنسى المساكين، ولا بتخيب أبدًا أمل المظلومين.
فيا رب متخليش البشر يغلبوا، ووقف الأمم العاصية قدامك علشان يتحاكموا.
يا رب نزل الرعب في قلوبهم،
وأشكف لهم عن ضعفهم علشان تعرف الأمم العاصية أنهم مجرد بشر.
10
يا رب محتاج لك
يا رب محتاجلك وحاسس أنك بعيد عني في وقت الشدة وقلبي حزين.
الأشرار بغرور بيصطادو المساكين،
فجازيهم بقدرتك جزاء الظالمين.
الأشرار بشهوات نفسهم فخورين،
وبلسانهم عليك يا رب مفتريين.
الكبر خلاهم عن التوبة معميين،
وبنعمتك يا رب كافرين.
أخدوا من الدنيا كل حاجة وفيها متنعمين،
لكن عن مشيئتك بيحيدوا وبيظلموا المساكين.
بيظنوا أنهم حيفضلوا على طول غالبين،
لكنهم ميعرفوش يا رب أنت مين.
بلسانهم فجرة وكدابين،
وفي الأذية والفساد تلاقيهم متقدمين.
في الطرقات للأبرياء مستخبين،
وبعنيهم للغلابة متربصين.
زي الأسد الجعان مستني فريسة يكون عليها العين.
بيستقوى بشر نفسه والغلابة من ظلمه مفزوعين.
بيتهيألهم أنهم بعيد عن قدرة ربنا وبيتمادوا في ظلم المساكين.
فيا قهار أرفع أيد قدرتك على الظالمين،
وأكشف عن رحمتك لعبادك المساكين.
ليه الأشرار بنعمة ربنا كافرين،
وبيظنوا أنهم مش متحاسبين؟
لكنك يا رب أنت غياث المستغيثين،
وأنت يا رب كافل اليتامىَ والمساكين.
يا رب أكسر ضهر الظالمين،
حاسبهم وامحي من قدامك الفاجرين.
يا رب أنت الملك إلى أبد الأبدين،
وأنت اللي بتمسح مِن على أرضك الفاسدين.
يارب أنت السميع لشكوىَ المساكين،
تثبت قلوبهم وتستجيب لدعوة المظلومين.
يا رب أنت بتكفل اليتامىَ وبتنصف المظلومين،
فأحفظهم يا رب للأبد من إرهاب الظالمين.
11
يا رب لك لجأت
يا رب لك لجأت وأنت حسبي، فإزاي الناس بتقول لي: «أهرب يا داود زي الطيور وفي الجبل أحتمي.
لأن الأشرار جهزوا أقواسهم وشدوا سهامهم على الأوتار، فالأشرار على الدوام متربصين علشان يؤذوا الأبرار.
فأحسن لك أنك تهرب في هدوء، لأنه إذا أنهارت أساسات المجتمع وسادت الفوضى وعم الخراب، فأيه اللي يقدر يعمله الصالحين؟»
لكن أنت يا رب من بيتك المقدس بتشوف كل خلقك، ومن فوق عرشك في السماء بتتفحصهم بعينك.
فأنت بتميز الصالحين من الطالحين، ومش بترضى عن الأشرار ولا الظالمين.
بتنزل على الأشرار حجارة من سجيل، وبتبتليهم بريح فيها عذاب أليم.
فأنت العدل يا رب وتحب المنصفين، وميقدرش يشوف نورك إلا الصالحين.
12
وعد الله حق
أغثنا يا رب لأن المتقين أنقرضوا،
وأختفى من بين البشر الصادقين.
يا رب الناس بقوا بالكذب بيتكلموا،
وبيتعاملوا بلسان باطل وقلوب منافقين.
اللهم أضرب على فم المنافقين،
وأقطع ألسنة الفَجرة الفاحشين.
لأنهم بيقولوا: الكلام حرفتنا ولساننا ثروتنا،
فمين ده اللي يقدر يغلبنا؟
لكن أنت يا رب بتقول: يا ظالمين،
أنتم بتأذوا المساكين،
فأحفظهم أنا وأستجيب لدعوة المظلومين.
سبحانك يا رب فإن وعدك حق،
وكلامك ثابت لا يُخيب المتوكلين.
يا رب، أراذل الناس علو فوق الأكرمين،
والأشرار بيمشوا في كل ناحية مفسدين.
وأنت يا رب بتحْفظ الأبرار الصادقين،
وبتكفيهم كيد الأشرار إلى أبد الأبدين.
13
لحد أمتى يا رب
يا رب، لحد أمتى حتسيبني؟
ولحد أمتى تحجب وجهك عني؟
ولحد أمتى أتحمل همومي وحسرة قلبي؟
ولحد أمتى يستكبر عدوي عليا ويغلبني؟
يا رب، أستجب لدعائي وساعدني.
فرد لي عافيتي ومن الموت أنقذني.
علشان عدوي ميقولش أنه قهرني،
ولا يشْمَت غريمي بكسري.
يا رب أنا عارف أنك حتكرمني،
وحيفرح قلبي لأنك حتنقذني.
أنا واثق يا رب أنك تقبلت دعوتي،
وبإحسانك عليا بسبح لك من كل قلبي.
14
الله ولي الصالحين
يا رب، الغافلين بيقول أن مشيئتك مش بتهمهم.
بعد ما فسدوا كلهم وساءت أعمالهم.
يا رب أنت المطلع على قلوب البشر،
وعارف لو فيه حكيم لرحمتك بينتظر.
لكن يا رب عَمَ الفساد وضل العباد،
ومفيش حد بيعمل الخير أو يرجو الرشاد.
وأنت يا رب بتقول لهم: يا غافلين،
ما لكم مش خايفين، وبتتربصوا بالصالحين؟
لازم تعرفوا أن الله ولي الصالحين،
وأنه حينزل عليكم الرعب علشان أنتم ظالمين.
فإذا كنتم أنتم بتستهزؤوا بالصالحين،
فاعرفوا أن الله هو مولى المساكين.
15
على صراط الحق
يا رب من اللي يجاور بيتك؟
ومن اللي يسكن في جبل قدسك؟
وانت يا رب بتقول: هم الصادقين
اللي بيتكلموا بالحق من قلوبهم،
واللي على صراط الحق ماشيين،
واللي مش بيفتروا على الناس بلسانهم،
ولا بيتكلموا بالشر علىَ أصحابهم،
ولا بيأذوا جيرانهم.
وهم اللي بيكرمو المتقين،
وعن الخبيث معرضين،
وعلى العهد والأمانة محافظين.
وهم اللي مش بيتعاملوا بالربا،
ولا بيقبلوا الرشوة ولا بيشهدوا زور،
وهم دول اللي حيفضلوا ثابتين.
16
أنت ربي وحدك/ يا رب أحميني فأنا لجأت لك
يا رب أحميني فأنا لجأت لك،
وقلت لك: أنت ربي وحدك، وكل اللي أنا فيه من نعمة فهي من عندك.
رضا نفسي يا رب أني أكون مع الصالحين من أوليائك.
لكن اللي بيشركوا بك آلهة تانين حيحزنو وتكثر أوجاعهم.
أما أنا فلا بشاركهم في عبادة آلهتهم ولا بينطق لساني أسمائهم.
فأنت يا رب رزقي وكافل حاجتي وأنت الضامن لقسمتي.
في أحسن أرضك سكنتني، وفرحتني بكل اللي وهبتني.
لك الحمد يا رب لأنك بترشدني، وفي الليل بتهذب قلبي وتعلمني.
يا رب بسبح لك دايمًا واتأمل في محضرك، فأنت معايا وبتكفلني بحمايتك.
بك يا رب يفرح قلبي ويسبح لساني، فتطمئن نفسي.
لأنك مش حتسيبني في عالم الأموات، ومش حتخلي وليك في ظلمات القبر يفسد.
فأنت يا رب بتهديني لطريق الحياة، بتسعدني بأني أكون معاك
وبتتنعم نفسي وأنا في حضرتِك.
17
استرني تحت ظل جناحك
يا رب أنا بريء، فاسمع دعوتي، وأنصت لصرختي، واصغي لصلاتي.
يا رب أنصفني واقضي ببرائتي، فعينك ربي تشهد باستقامتي.
فحصتَ قلبي وطهرتني، وفي الليل أختبرتني، فلقيتني بلا سوء وأفكاري مش بتخالف كلمتي.
ومش بعمل زي الأشرار من الناس، فأنا أتبعت كلامك ومن الشر حفظت نفسي.
فثبت يا رب على طريقك قدمي وأمن خطوتي.
أدعوك يا رب لأنك بتستجيب لدعوتي، وأنت القريب فاسمع شكوتي.
فأنت اللي بتنقذ اللي بيلجأو لك من ايد أعدائهم. فيا رب وفي بوعدك وأظهر عظمة رحمتك،
واحفظني في عينك، واسترني تحت ظل جناحك،
ونجني من أشرار بيسعو لهلاكي، ومن أعداء أجتمعوا لقتلي.
مفيش رحمة في قلوبِهم، وبالتكبر بينطق لسانهم.
يا رب أعدائي حصلوني وحصاروني، وعيونهم بتتربص لي علشان يقتلوني.
زي أسد مترصد لفريسته، وزي شبل متربص في مخبأه.
أغثني يا رب، أهزمهم وصدهم عني. أرفع سيفك عليهم ومن الأشرار خلصني.
يا رب نجني من الناس بإيد قدرتك، فهم أهل الدنيا الفانية وأخذوا منها نصيبهم.
أما أنا فبالإيمان أرى وجهك، وأقوم من نومي ونفسي راضية برفقتك.
18
يا رب أنت صادق الوعد
يا رب أنت قوتي ومحبتك في قلبي.
أنت صخرتي اللي بحتمي بها وأنت مخلصي. وأنت حصني ودرعي، وسيفي وملجأي.
سبحانك يا رب، فأنا بدعيلك وأنت بتخلصني من أعدائي.
لف الموت حباله حولين مني، وأمواج الموت كانت بتبلعني.
حبال عالم الموت حاصرتني، ونصب الموت فخه علشان يهلكني.
فدعيتك يا رب في ضيقتي، ومن علياء سمائك سمعتني.
فتزلزلت الأرض لما أستجبت لي، وجذور الجبال أهتزت من غضبك.
دخان ولهب نار حامية خرج في نفخة غضبك.
شقيت السما وفي غيوم السحاب قربت/نزلت في حضرتك.
جعلت الظلام حجاب والسحاب ستار حولين محضرك.
كرات برد وحمم نار نورت السماء قدامك.
لما اتكلمت دوى الرعد في السماء، ونزلت حمم النار زي المطر.
بسهام من برق شتت أعدائك.
أنشق البحر بأمرك، وتزلزلت أساسات الأرض بكلمتك.
مديت ايدك من السماء ونجيتني، ومن أعماق المياة خرجتني.
يا رب أنت أنقذتني من أعدائي، اللي كانوا أقوى بكثير مني.
هاجموني في وقت شدتي، لكنك يا رب دافعت عني.
ولما وقعت في الفخ، أنت حررتني لأنك يا رب رضيت عني.
يا رب أنت عوضتني بحسب صلاح نفسي، وجازيتني بحسب طهارة يدي.
فأنا ماشي على طريقك، ومش بعمل شر يبعدني عنك.
بحفظ وصاياك ومش بهمل شريعتك.
يا رب أنا بريء قدامك، وحفظت من الخطيئة نفسي.
وأنت بتحسن لىَّ بحسب طهارتي، وبتجازيني بحسب بر نفسي.
يا رب أنت صادق الوعد مع الصادقين، والكامل مع الكاملين.
وأنت الطاهر مع الطاهرين، والجبار مع الجبارين.
يا رب أنت اللي بتنجي المتواضعين وبتذل المتكبرين.
أنت يا رب بترعى حياتي وتهدي طريقي وتنور ظلمتي.
بعونٍ منك أهزم الجيوش، وبفضلك أقتحم أسوار المدن.
يا رب طريقك مستقيم وحق كلمتك، وأنت بتحمي كل اللي بيلجأ لك.
لا إله إلا أنت وحدك، ومفيش ملجأ لنا غيرك.
يا رب أنت اللي قويتني ولطريق الحق هديتني.
خليت رجلي خفيفة زي الغزال، ووقفتني بأمان فوق الجبال.
دربت للحرب أيدي، فتضرب ذراعي بقوس النحاس.
يا رب أنت الدرع اللي بيحميني، يمينك بتسندني، وبفضل منك كرمتني.
مهدت طريقي، وثبتت رجلي.
أطارد أعدائي لحد ما ألحقهم وأفنيهم.
أضرب بسيفي فيهم فيسقطوا تحت رجلي.
قويتني ونصرتني، وأخضعت لي كل اللي قاموا ضدي.
خليت أعدائي يهربوا من قدامي، ومكنتني من إبادة خصومي.
صرخوا لك ومستجبتش لهم، واستغاثوا بك فلم تغيثهم.
أسحقهم زي تراب ترميه الريح، وزي الطين في الطرقات أدوس عليهم.
خلصتني من المنازعين، وخلتني سيد على أمم التانيين.
خلتهم يخضعوا لي وييجوا قدامي زاحفين.
فقدوا شجاعتهم، وخرجوا من حصونهم مرعوبين.
سبحانك يا رب أنت الحي وأنت ملجأي، والمجد لك يا منقذي.
يا رب أنت أنتقمت لي، واخضعت الأمم لسلطتي.
نجيتني من أعداء قاسيين، وفوق خصومي الظالمين رفعتني.
أحمدك يا رب وأسبح بإسمك بين الأمم.
يا من نصرت الملك اللي أخترته، وأظهرت محبتك الأبدية لعبدك داود ونسله.
19
كلمة الله تحيي النفوس
سبحانك يا رب، السماوات بتتكلم عن مجدك، والأكوان بتكشف عن عمل أيدك.
الليل بيعلن عن عظمتك والنهار بيكشف عن قدرتك.
لا الأفلاك بتنطق بلسان ولا بتتكلم زي الإنسان.
لكنها بتبلغ رسالتها عبر كل الأرض وعلى مر الزمان.
والشمس ربنا خلقها بتطلع من أقصى السماء وبتمشي في مدارها.
ومفيش حاجة مستورة من حر نارها.
كلمة/طريق الله حق بتحيي النفوس، ووصايا الله صدق بتخلي الجاهل حكيم.
وشرع الله صراط مستقيم بيرضي القلوب، وفرائضه نقية بتنور العيون.
وتقوى الله طاهرة وعبادته دائمة على طول الزمان، وقضاء الله عدل وحق على مدى الأيام.
وهي كلها أغلى من كنوز الذهب النقي وأحلى من شهد العسل المصفي.
وأنا يا رب بأهتدى بكلمتك وثوابي عظيم في طاعة شريعتك.
فيا رب أغفر لي كل زلة أرتكبتها وأنا غافل عنها.
وأحفظني من الخطايا فماتتسلطش عليا، وأكون قدامك يا رب طاهر.
يا رب أجعل كلامي وأفكاري زي ما بتحب وترضىَ، فأنت يا إلهي وليي وانت ملجأي.
20
النصر من عند الله
يا رب أستجب لي في وقت الشدة، وأحفظني يا رب العالمين.
وأبعت لي نجدة من عندك ومدد من جبل قدسك.
يا رب اتقبل مني كل أضحية قدمتها في رضاك.
وأكرمني باللي بيتمناه قلبي، وتمم لي بحسب مشيئتك.
أللهم خلي شعبك يهتف بنصرك،
وعلى رايتنا نرفع أسمك، وأستجب لنا يا رب برحمتك.
أنا واثق يا رب أنك حتخلصني، وأنك حتستجيب لي، وبقدرة يمينك حتنصرني.
يا رب الأمم التانية بتتفاخر بجيوشها، أما أنا فبتوكل عليك وحدك.
علشان كده يا رب هم بيسقطوا ويقعوا، أما أنا فأنت بترفعني وتثبتني.
يا رب أنصرني وأستجب برحمتك لدعوتي.
21
يا رب أظهر مجدك
سبحانك يا رب، ما أعظم سعادتي بقوتك، ويا شدة فرحتي بنصرك.
عطيتني كل اللي يتمناه قلبى، وكل اللي طلبته منك وهبتني.
بفيض من الخير باركتني، وبتاج من ذهب توجتني.
طلبت منك تبارك في ملكي، فوهبتني مُلك لا ينتهي.
بمجد الإنتصار توجتني، وبالبهاء والجلال غطيتني.
عطيتني بركة أبدية، وفي حضرك فرحتني.
فأنا عليك توكلت يا علي يا عظيم، وأنت بتحفظني من الزلل برحمتك.
ايدك مرفوعة على أعدائك، ويمينك بتضرب كل خصومك.
يحرقهم اللهب قدام وجهك، والنار تأكلهم في غضبك.
من على الأرض تفني نسلهم، ومن بني آدم تمسح ذكرهم.
يتآمرو بالشر ويكيدو ضدك، لكنهم بيعجزو قدام قدرتك.
فأنت بترفع عليهم قوسك، فيهربوا مفزوعين من قدامك.
أظهر يا رب مجدك وقوتك، فنرنم لإسمك ونسبح بقدرتك.
22
يا رب ليه تركتني
ربي، ربي ليه هجرتني؟ وليه أنت بعيد عن نجدتي ومش بيوصلك صوت وجيعتي؟
ربي، في النهار أصرخ لك ومش بتستجيب لي، ولما يجي الليل مش بترتاح نفسي.
يا رب، أنت القدوس المهيمن، وكل شعبك بيسبحو بحمدك.
أبائنا وثقوا فيك، فنجيتهم لما توكلوا عليك.
وخلصتهم لما صرخوا إليك، ومخيبتهمش لما إعتصموا بك.
أما أنا فزي دودة مش إنسان، الناس بتحتقرني وبينفروا مني.
كل اللي يشوفني بيستهزء بي، ويهزو راسهم ويسخروا مني،
ويقولوا: «إن كان وثق بالله فخليه ينجيه، ويبقى ينقذه إن ربنا كان بجد رضىَ عنه».
لكن يا رب أنت من داخل الرحم خرجتني، وعلى صدر أمي أمنتني.
فأنت إلهي من يوم ولادتي، وأنت ربي من وقت ما كنت في بطن أمي.
يا رب متبعدش عني، فأنا في كرب ومفيش معين ينصرني.
يا رب حاوطني أعداء زي فحول الثيران وحاصروني.
زي أسود مفترسة بيتربصوا بي، وفتحوا بقهم عايزين ياكلوني.
يا رب، ضعفت قوتي، وانحلت عظامي، وذاب قلبي.
وهنت عافيتي ونشف لساني، ولتراب الموت تركتني.
زي الوحوش أتلف حوليا أعدائي، ونهشوا زي الكلاب ايدي ورجلي.
وأنا بأعد كل عظم جسمي وهم بيبصو لي وبيسخروا مني.
قسموا بينهم هدومي، وعملوا قرعة على ثوبي.
فيا رب ماتبعدش عني، أنت قوتي فعجل وأنجدني.
يا رب نجيني من أعدائي، ومن سيوفهم خلصني.
ومن الأسود اللي حوليا أنقذني. يا من استجبت لي ومن قرون الثيران خلصتني.
وأنا حمجد إسمك بين شعبك، وحأسبح لك أمام كل عبادك.
يا عباد الله سبحوا بحمده، ويا شعب الله أخشعوا له ومجدو أسمه.
فالله مش بيخيب رجاء المساكين، ولا بيحجب وجه عنهم،
وأنا لما صرخت لك سمعت صرختي.
في جموع المؤمنين بتملأ بالتسبيح قلبي، وقدام أوليائك أوفي لك بنذري.
بتطعم المتواضعين وتشبعهم، فيملأ الأمل قلوبهم ويسبحوا بحمدك.
فتشهد لك كل أمم الأرض، ويرجعوا لك ويعبدوك وحدك.
يا رب لك المُلك، وأنت المهيمن فوق كل الأمم.
يركع عظماء الأرض قدامك، ويسجد لك كل خلقك.
ونسلهم حيعبدك، وعلى مر الأجيال يشهدوا لك.
وكل اللي حيتولد حيسمع أنك نجيتنا بإحسانك.
23
الله يكفيني
يا رب أنت وليي وأنت اللي بترعاني،
ومعاك عندي كل اللي يكفيني.
في مراعي خضرا تسكني،
ولعذب المياة تهديني.
فتنعش نفسي وترد لي عافيتي.
وكرامة أسمك على طريقك تهديني.
حتى لو مشيتَ في ظلمات الموت ماخافش أذية،
فأنت معايا وأيدك بترعاني وتحميني.
أنت يا رب بتضايفني في وليمة وتُكَرمني
قدام كل أعدائي،
ترفعني وتكرم ضيافتي
ويفيض بكرمك كأسي.
أنا واثق يا رب أن رحمتك ونعمتك حتفضل معايا،
و في جوارك للأبد حيكون سكني.
24
الملك الجليل
لله مُلك السماوات والأرض وما فيها.
خلق الدنيا وعلى المياة وضع أساسَاها.
مين اللي يستحقوا يطلعوا على جبل القدس ويقفوا في بيت الله المقدس؟
هم أصحاب القلوب الصافية والإيدين الطاهرة، اللي مش بيكذبوا ولا بيحلفوا زور.
والله القدير يرضى عنهم ويباركهم وينجيهم.
هم دول حزب المؤمنين اللي بيطلبوا وجه الله رب العالمين.
يا خدام بيت الله أفتحوا أبواب بيت الله، فيدخل الملك الجليل.
ومين هو الملك الجليل؟ هو ربنا وإلهنا القهار القدير.
يا خدام بيت الله أفتحوا أبواب بيت الله، فيدخل الملك الجليل.
ومين هو الملك الجليل؟ ربنا الغالب الجبار هو الملك الجليل.
الملك الجليل (معدل - دعاء)
يا رب لك مُلك السما والأرض وما فيها.
خلقت الدنيا وعلى المياة وضعت أساساها.
يا رب، من اللي يستحقوا يطلعوا على جبل القدس ويقفوا في بيتك المقدس؟
أنت قلت يا رب، أنهم أصحاب القلوب الصافية واليدين الطاهرة،
اللي مش بيكذبوا ولا بيحلفوا زور.
وأنت يا رب القدير، ترضى عنهم وتباركهم وتنجيهم.
هم دول حزب المؤمنين اللي بيطلبوا وجهك يا رب العالمين.
25
يا رب لك أسلمت نفسي
يا رب لك أسلمت نفسي.
وعليك توكلت يا إلهي. فلا تخزيني، ولا تشمت بي أعدائي.
يا رب أنت مش بتخيب رجاء المتقين، لكنك بتخزي الخونة الكدابين.
ربي عرفني طريقك، وعلمني أزاي أتبع سبيلك.
يا رب أهدني للحق وبصرني، فأنت ربي ومنقذي، وعليك دايمًا توكلي.
يا رب أذكر رحمتك بيا وأنك بمحبتك دايمًا غمرتني.
ربي أستر ذنوب ومعاصي صبايَّا، وأكشف عن لطفك وفي رحمتك أذكرني.
يا رب أنت البر الودود، وأنت اللي بتهدي العاصين لسبيلك.
بترشد المتوكلين عليك للحق وبتعلمهم طريقك.
كل طرقك يا رب لطف ورحمة للي يطيعك ويحفظ عهدك.
بحق إسمك يا ربي، أغفر لي لأن عظيم ذنبي.
فكل المخلصين في عبادتك، بتهديهم لطريقك بحسب مشيئتك.
فيعيشو في نعمة، ونسلُهم يورثوا العهد من بعدهم.
فأنت بتلطف بالمتقين من عبادك، وبترشدهم علشان يحفظوا عهدك.
يا رب، دايمًا بتوجه إليك بعيني، لأنك من الفخ بتنجيني.
ربي، أنا وحيد ومكروب، فالتفت لىَّ وارحمني.
يا رب زادت هموم قلبي، فبرحمتك فرج عني كربي.
ربي، معصيتي ذلتني، فبلطف منك أغفر لي ذنبي.
يا رب أنت شايف كثرة أعدائي، وأنت عالم قد أيه بيكرهوني.
ربي لك لجأت، فاحفظني ومتخيبش أملي.
يا رب أعصمني بالأمانة والإستقامة، فانا توكلت عليك من كل قلبي.
فيا رب نجي كل المؤمنين بك، وخلصهم من كل ضيق بقدرتك.
26
يا رب أظهر برائتي
يا رب أظهر برائتي لأني اتوكلت عليك باليقين، ومشيت على صراطك المستقيم.
ربي، أختبر أفكار نفسي، وتفحص نيتي وبطانة قلبي.
يا رب، مش حنسى أبدًا رحمتك، وأنا بالحق ماشي على طريقك.
لا بخالط الكذابين ولا بقعد مع المنافقين.
بقاطع جماعة الشر وبتجنب مجلس الفاسدين.
وطهرت يدي علشان أعلن برائتي قدامك. أدخل بيتك يا رب واتعبد لك،
وأسبح بحمدك وأهتف بعجائب قدرتك.
يا رب نفسي بتشتاق لبيتك، ولحضرة مجد جلالك.
فيا رب، ماتموتش نفسي مع الظالمين، ولا تهلكني مع القتلة المفسدين.
ولا مع اللي بيعملوا الشر المرتشين.
وأنا يا رب بالحق ماشي على طريقك، فخلصني وأرحمني برحمتك.
يا رب إيماني ثابت باليقين، وحسبح بإسمك في جماعة المؤمنين.
27
يا رب أنت النور
يا رب أنت النور وأنت حافظ حياتي، فمفيش حاجة تخوفني. وأنت اللي بتحميني، فمفيش حد يرهبني.
يخيب الأشرار لما يحاصروني علشان يأكلوا لحمي، ويسقط أعدائي لما يهاجموني.
لو أحاطت بي جيوش ما يخافش قلبي، وإن قامت حروب ضدي أتوكل عليك لأنك حصني.
يا رب أمنية قلبي أني أسكن في حرمك، واتأمل في جلالك، وأتعبد في قدسك كل أيام حياتي.
لأنك يا رب في يوم الشر بتنجيني، وفي حرمك بتحميني، وعلى ربوة آمنة بترفعني.
فانصرني ربي على أعدائي اللي حاصروني.
وأنا يا رب أقدم أضحيات الحمد في حرمك، وأرنم لك وتسبح بإسمك نفسي.
فيا رب أسمع صرخة قلبي، وبرحمتك أستجيب لدعوتي.
ألتفت لي ربي، فأنا يا رب بسعى لوجهك من كل قلبي.
فلا تحجب وجهك عني، ولا تغضب على عبدك، وخليك قريب مني.
أنت المنجي يا رب، فتقبل مني وما تتخلاش عني.
إن هجرني أبي وأمي، أنت يا رب ترعاني.
يا رب كثر أعدائي، فعلمني أمشي على طريقك، ولصراط الحق أهديني.
يا رب قام ضدي شهود زور وأشرار بيهددوني، فماتخليهمش يتمكنوا مني.
وأنا واثق يا رب أني حشوف إحسانك عليَّ طول حياتي.
يا رب توكلت عليك ومنتظر رحمتك، فشجعني وقوي قلبي.
28
صرخت إليك يا ربي
صرخت لك يا ربي و ملجأي، فمتسدش بابك في وجهي.
فيا رب لو رفضتني، سقطت في هاوية الموت نفسي.
بستغيث بك يا ربي، وفي حرمك المقدس رفعت لك يدي، فأسمع يا رب صرختي.
يا رب عنك ما تبعدني، ومع المفسدين ما تجمعني.
الأشرار بيكلموا أصحابهم بالعفو والسلام، وفي قلوبهم بيخفوا كيد اللئام.
أللهم جازيهم باللي يستحقوه، وحاسبهم على خطاياهم والشر اللي بيعملوه.
وأنت يا رب تهدمهم وتزيل عملهم،
لأنهم بيكفروا بعمل يدك وبينكروا قدرتك.
وأنا أسبح بحمدك يا رب لأنك بتستجيب دعوتي.
يا رب أنت حصني، وعليك توكلت من كل قلبي.
نصرتني ففرحت قلبي، وبحمدك بتسبح نفسي.
يا رب أنت قوتنا وحصننا المتين، وأنت اللي بتحفظ عبادك المصطفين.
يا رب نجي شعبك، وبارك المؤمنين بك، وأكفلهم للأبد برعايتك.
29
كلمة الله
سبحي يا كل ملائكة السماء بمجد الله العزيز.
عظمي أسمه الجليل، وتعبدي للقدوس المجيد.
كلمة الله بتدوي فوق المياة، وصوته بيرعد فوق البحار.
كلمة الله بتدوي بالقدرة، وصوته بيرعد بالجلال.
كلمة الله بتهدر زي العاصفة تكسر أشجار أرز لبنان.
بتنفض جبال لبنان، وبتزلزل جبل حرمون.
كلمة الله بتضرب زي البرق.
كلمة الله بترجف البرية، وبتزلزل الصحراء.
كلمة الله بتهز الأشجار في الغابات،
فيعلا الهتاف بالتسبيح في بيته المقدس.
الله من فوق عرشه بيسخر الطوفان، وهو الملك الدائم للأبد.
فيا رب عزنا وقوينا، وبالسلام باركنا.
30
أسبح بإسمك يا إلهي
يا رب أسبح بمجدك لأنك من الموت نجيتني، ومخلتش أعدائي يشمتوا بموتي.
أستجرت بك يا ربي وإلهي فشفيتني.
من القبر رفعتني، ومن حفرة الموت خرجتني.
يا عباد الله، سبحوا لله ومجدوا أسمه القدوس.
يا رب غضبك مش يدوم كتير، أما رضاك فمدى الحياة.
يدوم البكاء ظلام الليل، لكن الفرحة تعم لما يطلع النهار.
في وقت اليسر أخذني الغرور وقلت في نفسي: مفيش حاجة ممكن توقعني.
وأنا ثابت زي رواسي الجبال برضاك عني.
لكنك غضبت عليَّ وحجبت وجهك عني، فتملك الرعب مني.
فلك بصرخ يا ربي، ولك بتضرع يا إلهي.
فأيه فايدة موتي ونزولي في قبري؟
فإزاي ممكن لو بقيت تراب أني أسبح بحمدك أو أعلن صدق وعدك؟
يا رب أستجيب دعوتي، وساعدني يا إلهي وارحمني.
بدلتني فرحة من بعد حزني، فرحت قلبي ونزعت هدوم الحداد عني.
أسبح بإسمك يا إلهي، وللأبد بحمدك من كل قلبي.
31
يا رب لك سلمت أمري
يا رب إليك لجأت فلا تخيبني، ونجيني زي ما وعدتني.
يا رب أسمع دعوتي وعجل بنجدتي. أنت يا رب ملجأ يأويني وحصن بيحميني.
يا رب أنت ملجأي وحصني، وعلشان مجد أسمك أرشدني وأهديني.
يا رب أنقدني من الفخاخ اللي نصبها لي أعدائي، وبرحمتك أحفظني.
يا رب أنت صادق الوعد، في أيدك أستودعت روحي، فنجيتني.
يا رب، أنا بتجنب اللي مش بيؤمنو بك، وعليك وحدك توكلي.
يا رب أنت الودود وبرحمتك بتفرح نفسي، أنت شفت ذُلي، ولطفت بيَّ في كربي.
يا رب ماتسلمنيش لأيد أعدائي، وفي أمان ثبت رجلي.
يا رب أنا مكروب فألطف بي. الكرب بيؤذي روحي وجسمي والغم عمى عيني.
ضيعت في الحزن عمري، وفي الغم ضاعت أيامي،
ضعفت قوتي من قسوة عقابي، ومن الشقا أتكسرت عظامي.
أعدائي بيعيروني، وجيراني بينفرو مني، أصحابي بيحتقروني، ومعارفي بيتهربو مني.
نسوني تمامًا وكأني ميت، وزي إناء مكسور أهملوني.
يا رب الخوف بيحاوطني، وأنا بسمع الناس بيهمسوا ويتأمروا علشان يقتلوني.
لكن يا رب عليك توكلي، وقلت من قلبي أنت إلهي.
يا رب لك سلمت أمري، فنجيني من أعداءٍ بيطارودوني.
يا رب أشرق بنور وجهك على عبدك، وبحسب وعدك أنقذني.
ربي بأدعيلك وحدك فمتتخيبش رجائي. بقدرتك أخزي أعدائي الظالمين،
أخرسهم ونزلهم قبورهم مبهوتين.
أللهم أخرس ألسنة الكذبة المتكبرين، وأمنع أذاهم عن عبادك الصالحين.
يا رب قدام كل الناس بتنعم على المتقين، وبتلطف باللي بيلجألك من المتوكلين.
بتحفظهم من كيد الحاقدين، وأنت اللي بتسترهم من إفتراء النمامين.
يا رب لك الحمد لأنك حفظت وعدك ورحمتني لما أجتمع أعدائي وحاصروني.
لما تملكني الرعب قلت في نفسي أنك هجرتني.
لكنك يا رب سمعت صرختي وبرحمتك أغثتني.
يا عباد الله، أخلصوا لله وأظهروا له محبتكم. فالله بيحفظ الصادقين، وبيعاقب المتكبرين.
فافرحوا وتشجعوا يا كل عباد الله المتوكلين.
32
افرحوا برحمة الله يا طاهرين القلوب
يا رب ما أعظم نعمتك على اللي عفيت عن معاصيهم، وسترت خطاياهم.
وعلى اللي تجاوزت عن ذنوبَهم، واللي مفيش غش في قلوبهم.
يا رب ، لما كتمت خطيئتي، اتنخر عظمي وأنا بنوح طول يومي.
كانت ايدك شديدة عليَّ طول نهاري وليلي، فذبلت صحتي وراحت قوتي.
فاعترفت لك يا رب بخطيئتي، وأقريت بذنبي،
وقلت لك: ”يا رب أغفر لي أثمي وتجاوز عن سيئاتي.“
أللهم أجعل أوليائك يتوبو عن ذنوبهم،
فإذا السيول أنهمرت في وقت الضيق، ميقربش الطوفان منهم.
يا رب أنت ملجأي، في وقت الضيق بتحفظني، وبنجدتك بيسبح قلبي.
يا رب أنت قلت لي: ”حكون معاك أرشدك وأرعاك، وأهديك على صراطي المستقيم.
فبلاش تكون زي الفرس الجامح، اللي تحكمه بالكرباج وتسوقه باللجام.“
يا رب، كتير المصائب اللي بتقع على الأشرار،
أما المتوكلين عليك فبتحفظهم بلطفك زي ما وعدتهم.
فافرحوا برحمة الله يا طاهرين القلوب، ويا أولياء الله سبحوله من قلوبكم.
33
عين الله تبصر المتقين
سبحوا لله يا عباد الله الصالحين، فتسبيح الحمد يليق بالمتقين.
سبحوا بحمد الله على العود، ورنموا له على كنارة بعشر أوتار.
أنشدوا بأنغام مسمعهاش الناس قبل كده. أحسنوا العزف واهتفوا وأنتم بتنشدو.
كلمة الله حق يقين، وعلى مشيئته بيتوكل الصالحين.
الله بيرضى بالعدل وهو الحق، ووعده بالرحمه وسع كل الأرض.
انشأ السماوات بكلمته وبأمره خلق فيها أفلاكها.
هو اللي جمع مياة البحر وفي الأعماق خزنها.
أتقوا الله يا كل خلق الله، واخشعوا له يا كل العالمين.
فهو اللي شاء فكان، وبكلمته خلق الأرض كلها.
الله بيحبط مكائد الأمم العاصية، وبيفسد نوايا البشر الفاسدين.
لكن مشيئة الله خالدة، وقصده ثابت يقين.
فهنيئًا لأمة ربها الله، ولشعب أصطفاه الله لنفسه.
الله هو البصير بعباده.
ومن علياء سمائه مطلع على كل خلقه.
هو العليم باللي في قلوبهم، وهو الرقيب على أعمالهم.
أعلموا أن الملوك مش بينتصرو بكثرة جيوشهم، ولا بيغلبو بعظمة قواتهم.
فالفرس في الحرب مش بينجي وإن عظمت قوته.
عين الله بتبصر المتقين، وبترعى المتوكلين على رحمته.
فالله بيحفظهم من المجاعة، ومن الموت بينجيهم.
واحنا بنتوكل على الله، هو بيحمينا ويدافع عنا.
بالله بتفرح قلوبُنا، فهو القدوس وعليه توكلنا.
يا رب عليك توكلنا، فارحمنا زي ما وعدتنا.
34
رحمة الله قريب من المحسنين
يا رب لك الحمد في كل حين، وتسبيحك دايمًا في فمي.
أمجدك يا رب من كل قلبي، فيفرح المساكين لما يسمعوني.
مجدوا الله معايا، وعظموا أسمه العلي.
دعيت الله فاستجاب لي ونجاني من كل اللي بيخوفني.
فاسعوا لوجه الله فيشرق نوره على وجوهكم، وربنا مش حيخيبكم.
يا رب أنا المسكين، صرخت لك فسمعتني، ونجيتني من كل متاعبي.
فملائكتك يا رب بتحفظ المتقين.
يا عباد الله اتأملوا وذوقوا رحمة الله، وهنيئًا لهم المعتصمين.
أتقوا الله يا عباد الله المصطفين، فالله بيكفي عباده المتقين.
تجوع الأسود وتعاني، أما المتوكلين على الله فمن كل الخيرات مكتفيين.
يا أبنائي أسمعوا كلامي، فأعرفكم تقوى الله.
إن كنتم عايزين تتهنوا بحياتكم وتطول أعماركم،
فماتكدبوش، ولا ينطق بالباطل لسانكم.
اتجنبوا الشر وسارعوا في الخير، واتبعوا طريق السلام في حياتكم.
فرحمة الله قريبة من المحسنين، وهو بيسمع دعوتهم وبيستجييب لهم.
لكن الله بيغضب على الأشرار، وبيمحي من على الأرض ذكرهم.
إن أستغاث المتقين، فربنا بيسمعهم ومن كل كرب ينجيهم.
فالله قريب من المنكسرين، وهو اللي بينجي المقهورين.
إن عظم البلاء على المتقين، فالله ينجيهم من كل إبتلاء عظيم.
والله بيحفظهم فماتنكسرش واحدة من عظامهم.
الشر بيقتل الأشرار، والعقاب للي بيعادي الصالحين.
ربنا بيخلص عباده المتقين، ومن عقابه بينَجي المتوكلين.
35
يا مَن تحمي المساكين
يا رب أنت القهار فحارب اللي يحاربني، وعادي اللي يعاديني.
إلهي، ساعدني وكن لي درع يحميني.
وجه حربتك ضد كل اللي بيطاردوني، وعاهدني بأنك تنجيني.
أللهم أخزي كل اللي بيسعو لقتلي، وخيب كل من دبر علشان يؤذيني.
أبعت ملائكتك عليهم، شتتهم زي القش في مهب الريح كلهم.
أللهم أجعل طريقهم ظلمة وهلاك، فتزل رجليهم وملائكتك بتطاردهم.
فأنا مأذيهمش، لكن هم اللي نصبوا لي فخ علشان يصطاودني، وحفروا لي حفرة علشان يقتلوني.
أللهم فاجئهم بالمصائب، فيقعوا في الفخ اللي نصبوه لي،
ويسقطوا في الحفرة اللي حفروها علشان يوقعوني.
فتفرح نفسي بك يا إلهي لأنك بتنجيني.
واسبح لك بكل كياني: "مفيش حد زيك يا إلهي"
أنت اللي بتحمي المساكين من الطغاة، وبتنجي المظلومين من الظالمين.
يا رب، أعداء مفترين شهدوا ضدي، وبحاجات معرفهاش بيتهموني.
جازوني شر على إحساني، وبيتربصو بيا علشان يقتلوني.
وأنا يا رب واسيتهم في مرضهم، ولبست هدوم الحداد من عطفي عليهم.
وعلشانهم تعبت نفسي من كتر الصوم، ودعيت لهم من كل قلبي.
كنت لهم أخ وصديق وفي، وحزنت عليهم وكأني بأحزن على أمي.
لكن لما وقعت أتلموا حوليا وشمتوا في وقعتي، سخروا مني ومرحموش ضعفي.
أراذل الناس أستهزءوا بيا وزادوا في إهانتي.
فلحد امتى يا رب حتسيبني؟ فيا رب نجي نفسي من الوحوش المفترسة اللي اتلمت علشان تهلكني.
وأنا أسبح لك في جموع المؤمنين علشان بتنجيني، وقدام كل الناس أحمدك من كل قلبي.
يا رب ما تشمتش فيا أعداء ظالمين، ولا تجعل اللي بيكرهوني يفرحوا بمصيبتي.
فلسانهم مش بينطق إلا بالأذى، وبيفترو بالباطل على الناس المسالمين.
يا رب أعدائي أتهموني زور وقالوا: أحنا شفنا بعيننا أنك أنت الجاني.
لكن يا رب أنت البصير، فمتسكتش ولا تتخلى عني.
فيا ربي وإلهي، عجل ودافع عني.
أللهم أنصفني بعدلك واظهر برائتي، وماتخليش أعدائي يشمتوا بكسري،
ويقولوا: عملنا اللي أحنا عايزينه، ودلوقتي ناكل لحمه.
فيا رب خيب اللي شمتوا في مصيبتي، واخزي أعدائي المتكبرين اللي سخروا مني.
يا رب فرح قلب كل من عايز برائتي، فيسبحوا بعظمتك لأنك رضيت بسلامتي.
وأنا يا رب حذكر رحمتك واسبح بحمدك طول حياتي.
36
يا رب ما أعظم لطفك
الشرير بيمشي ورا صوت الشر اللي في قلبه، وتقوى الله مش بتخطر على باله.
بيخدع نفسه ويتكبر، فلا يشوف خطيئته ولا يتبرأ منها.
كلامه غش وخداع، ميعرفش طريق الحق ولا يتعامل بالإحسان.
بيفكر في الأذية حتى وهو نايم. بيسعى في طريق الفساد، وعن الشر مش بيرجع.
لكن يا رب أنت الودود صادق الوعد، واحنا بنتوكل عليك وحدك.
إحسانك ثابت زي قمم الجبال، وعدلك صمد زي أعماق البحار.
وأنت اللي بترعى الإنسان والحيوان برحمتك.
يا رب ما أعظم لطفك، كل بني آدم بيحتمو تحت جناحك.
فتشبعهم من خيرات فضلك، وتسقيهم من أنهار كرمك.
يا رب نبع الحياة عندك، ومش بنشوف النور إلا بنورك.
فديم رحمتك يا رب على أوليائك، واحفظ الطاهرين بحسب عهدك.
يا رب ما تسمح لظالم أنه يدوس رأسي، ولا لشرير أنه يبعدني عنك.
يا رب المجد لك، فأهم الأشرار سقطو ومقدروش يقفوا قدامك.
37
أصبر وتوكل على الله
ما تتحسرش على الفاسدين، وماتغيرش بسبب الظالمين.
فهم زي العشب بيدبلوا وزايلين.
توكل على الله وأعمل الطيب، عَمّر الأرض وعيش في سلام.
أرضى بالله، يعطيك الله رضا قلبك.
فوض لله أمرك، وتوكل عليه يصلح حالك.
فيظهر الله صالح عملك، وتسطع زي نور الشمس برائتك.
أصبر وتوكل على الله. ماتحزنش لو أتوفق الأشرار ونجحت مكائدهم.
ماتغضبش بسببهم وأكتم غيظك، وإلا وقعك في الشر غضبك.
فكل الأشرار زائلين، والأرض يورثها الصالحين.
قريب يفنى الأشرار، ومن غير رجعة يخفى أثرهم.
أما المتوكلين على الله فيورثو الأرض، وبالسلام يتنعموا.
الأشرار بيعضوا على أسنانهم وهم بيتأمروا على الصالحين.
لكن الله بيسخر منهم، فهو عليم بقرب حساب الظالمين.
شهر الأشرار سيوفهم وأطلقوا سهامهم علشان يهلكوا الفقراء والمساكين،
ويقتلوا المتمسكين بالصراط المستقيم.
لكنهم حيهلكوا بسيوفهم، وتتكسر سهامهم.
القليل اللي عند الصالحين، أحسن من الكثير اللى عند الفاسدين.
فالله بيكسر يد الفاسدين، وبيقوي الصالحين.
الله عليم بحال المتوكلين، وعطائه لهم دائم مقيم.
في وقت البلاء يقويهم، وفي وقت المجاعة يشبعهم.
الأشرار بيعادو الله فبيهلكو، وزي عشب الأرض بيزولو.
الأشرار بيستلفوا ومش بيسددوا ديونهم، أما الكرم فشيمة الصالحين.
فالله يورث الأرض للي باركهم، وبيمحي من عليها الملعونين.
الله بيثبت اللي بيعتصم بصراطه المستقيم.
فلو وقع، يد الله بتسنده وترفعه.
ربنا مش بينسى الصالحين، ولا نسلهم بيكونوا محتاجين.
فيكونوا كرماء وعطوفين، ونسلهم بركة للناس التانيين.
أعملوا الخير وإجتنبوا الشر، والله يوهبكم حياة الخالدين.
فإن الله بيحب العادلين، يحفظهم دايمًا ومش بيهمل عباده الصالحين،
أما نسل الأشرار فهالكين.
والأرض يورثها عباد الله الصالحين، فيسكنو فيها خالدين.
فم الصديق بيتكلم بالتقوى ولسانه بينطق بالعدل.
بيحفظ شرع الله في قلبه، فتثبت خطوته ومش بيزل.
الأشرار بيتربصو علشان يهلكوا الصالحين،
لكن الله بيدافع عنهم، ووقت الحساب مش بيكونوا مدانين.
أصبر وتوكل على الله، فيرفع قدرك وتورث الأرض،
وتشوف بعينك هلاك الفاسدين.
شفت أشرار ظالمين بيتعالو في الأرض زي الأشجار.
لكنهم فجأة زالوا وكأنهم ما كانوا.
أتبعوا المتقين وتولوا الصالحين، فتكون لكم حُسن عاقبة المسالمين.
أما الأشرار فزايلين، والهلاك نهاية الظالمين.
الله بيحفظ الصالحين ويخلصهم، ووقت البلاء هو ملجأهم.
ولأنهم بيلجأو له، فالله بيعينهم ويحميهم ومن الأشرار بينجيهم.
38
أنت العالم بلهفة قلبي
يا رب، ماتعاقبنيش بسخطك، ولا تأدبني بغضبك عليا.
فسهامك أصابتني، وإيدك ضربتني.
من غضبك ضعف جسمي، وخطيئتي نخرت عظمي.
ذنوبي علت فوق رأسي وغرقتني، وحمل خطيئتي فوق طاقتي.
نتنت جروحي وعفنت بسبب غفلتي.
أنحنى جسمي وأنكسر ظهري، وأبكي من الحزن طول يومي.
الحُمّىَ بتحرق خصري، والألم بيضعف جسمي.
ضعفت والعجز ذلني، ومن شدة ألمي علا أنيني.
يا رب أنت العالم بلهفة قلبي، ومش خافي عليك نواحي.
من الألم بيدق قلبي، وراح النور من عيني.
في مصيبتي، أصحابي أحتقروني وقرايبي اتخلوا عني.
اللي بيسعو لهلاكي نصبوا فخاخهم لقتلي،
واللي بيدبروا لأذيتي طول الوقت بيتأمروا علشان يتخلصوا مني.
وأنا بأتغافل وكأني مش سامعهم، وزي الأخرس مش بينطق فمي.
سديت من كلامهم وداني، وخرست عن جدالهم لساني.
يا رب عليك توكلت وأرجو أنك تستجيب لي.
يا رب ماتشمتش فيا أعدائي، وماتخليهمش يفرحوا في مصيبتي.
فأنا على وشك الإنهيار، والألم مش يفارقني.
ربي، أعترف لك بذنبي، وأنا نادم على خطيئتي.
يا رب، خصومي كثير قتلة وقاسيين، ومن غير سبب بيكرهوني.
بيجازوني بالشر على إحساني، وعلشان بأتبع طريق الحق بيعادوني.
يا رب خليك جانبي وماتتخلاش عني.
عجل بنجدتي يا رب وخلصني.
39
يا رب ارفع البلاء عني
يا رب، لما أشتدت محنتي نويت أن في حضرة الأشرار أصون فمي،
وما أرتكبش خطيئة بلساني.
فألتزمت الصمت تمامًا، لكن الصمت زود ألمي.
ولعت النار في قلبي، وكل ما فكرت أكثر زادت نيران أحزاني، فاشتكيت لك وقلت:
يا رب، أيامي فانية، فعرفني أجلي، وامتى تكون نهايتي؟
يا رب، أنت خليت حياتي قصيرة وعمري فاني. وايه حياتي قدامك إلا نسمة فانية.
فالإنسان زايل زي الظل، يكد وتعب بلا جدوى، يكنز ثروة ومايعرفش من حيتنعم بها.
والآن يا رب أيه اللي أرجوه من الدنيا؟ فأنا رجائي فيك وحدك.
خلصني من كل ذنوبي، وماتخليش السفهاء يسخروا مني.
يا رب عرفت أنك أبتليتني، فسكت ومفتحتش فمي.
يا رب ارفع البلاء عني، فضربة يدك أهلكتني.
فأنت بتحاسب الإنسان على الخطايا، وزي الأرضة بتهلك ثروته.
فايه الإنسان قدامك إلا نسمة زايلة.
يا رب أستجيب لدعوتي، وأسمع صرختي، فالدمع فاض من عيني،
فأنا غريب في الدنيا دي، وعابر سبيل فيها زي ما عبر آبائي.
يا رب ارفع غضبك عني، فيفرح قلبي قبل ما أموت وينتهي أجلي.
40
من عفوك لا تحرمني
يا رب دعيت لك، صبرت وأنتظرت، فالتفت لي وسمعت صرختي.
من الموت أنقذتني، ومن وحل القبور رفعتني. أمنتني وعلى الصخر ثبت رجلي.
يا رب، خليت تسبيحة حمد جديدة في فمي. كثير يشهدوا فيمجدوك ويتوكلو عليك يا إلهي.
فأنت يا رب بتبارك المتوكلين، واللي بيمتنعوا عن المشركين وعن كذب المتكبرين.
يا رب عظيمة معجزاتك معانا، ومنقدرش نعد مشيئتك بالخير لنا،
ولا نقدر أن نوصف كل أفضالك علينا.
يا رب، فتحت لي ودني فعرفتني أن طاعتك خير من تقديم الآضاحي،
وطاعة مشيئتك خير من إحراق القرابين.
وأنا يا رب قلت: حعمل اللي كتبته عليَّ في كتابك.
أرضىَ بمشيئتك وفي قلبي أحفظ شريعتك.
بشرت المؤمنين وقلت لهم أنك من الموت أنقذتني.
بينت لهم رحمتك بيا، وأنك وفيت بعهدك ونجيتني.
فيا رب، ماتحرمنيش من عفوك، وبرحمتك دايمًا احفظني.
يا رب، شرور كثيرة حصلتني، وذنوب أكثر من شعر رأسي بتحاوطني،
قلبي مكسور وعميت عن الحيلة عيني.
فألطف بي ونجيني، عجل يا رب بنجدتي.
أللهم اخزي كل اللي عايز يهلكني، وخيب كل اللي يفرح بأذيتي.
أللهم نزل الرعب في قلوب اللي بيسخرو مني.
أللهم أسعد قلوب المتوكلين عليك، فيسبح دايمًا بعظمتك كل اللي بيطلبو رحمتك.
يا رب أنا عاجز ومسكين، وأنت اللي بتنقذني وتكفيني. فعجل يا رب بنجدتي.
41
يا رب أرحمني
يا رب سبحانك، في وقت الكرب بتنجي المحسنين، فهنيالهم اللي بيحسنو على المساكين.
فأنت يا رب بتحفظهم وبتسعد على الأرض حياتهم، ومش بتسلمهم لشهوات الظالمين.
لو مرضوا فأنت بتشفيهم، وترد لهم صحتهم.
يا رب أرحمني. أشفيني وبرئني من ذنبي.
يا رب، أعدائي خبثا وبيتسائلو: امتى يكون هلاكي وزوال ذكري؟
لما بيجوا يزوروني، بيتكلمو بالشر عني، ولما بيخرجوا من عندي بيذموا في حقي.
يا رب، أعدائي بيتآمرون ضدي، وبيهمسوا ويقولوا عني:
ضربه داء يهلكه، ومش حيقوم من رقدته.
حتى أعز أصدقائي، اللي أكل عيشي وملحي، أنقلب ضدي.
فتحنن عليَّ يا رب واشفيني، فأجازيهم على اللي عملوه معايا.
يا رب ماتشمتش فيا أعدائي، علشان أعرف أنك راضي عني.
يا رب، أنت بتساعدني بحسب أستقامتي، ورحمتك للأبد قريبة مني.
لك الحمد دائمًا وللأبد يا رب العالمين.
42
ليه يا نفسي حزينة
يا رب، شوق نفسي ليك، زي لهفة غزال عطشان لغدير المياه.
نفسي مشتاقة لك يا حي يا قيوم. فامتى يا رب أشوف نور وجهك؟
دموعي بقت قوُتي طول نهاري وليلي، وطول يومي بيسألوني فين هو إلهي؟
يا رب، الحزن بيفيض في قلبي لما بافتكر قيادة موكب حجاج بيتك،
وفرحتي بهتاف الحمد لك وسط جموع المسبحين.
فليه يا نفسي كده حزينة ومهموم قلبي؟ فأنا توكلت عليك يا ربي، ودايمًا أحمدك لأنك بتنجيني.
يا رب، وأنا هنا عند منبع نهر الأردن على جبل حرمون، أذكرك ونفسي حزينة.
سيل من الحزن غمرني، وزي الفيضان الهادر جرني.
دعيت لك يا ربي الحي وأنت بتتولاني طول أيامي برحمتك، وفي الليل باسبح بحمدك.
يا ربي وملجأي، ليه هجرتني؟ وليه أعيش حزين من عدو بيضطهدني؟
يا رب، الألم بينخر عظمي، و طول يومي أعدائي بيسخروا ويسألوني فين هو إلهي؟
فليه يا نفسي كده حزينة ومهموم قلبي؟ فأنا توكلت عليك يا ربي، ودايمًا أحمدك لأنك بتنجيني.
43
يا رب أنصفني
يا رب أنصفني وابعد عني شر الجاحدين، ونجيني من مكر الكذابين.
يا رب لجأت إليك، فليه يا رب خذلتني؟ وليه أعيش حزين من عدو بيضطهدني؟
يا رب أهديني للحق بنورك، ودلني لمحضرك على جبل قدسك.
فأتعبد لك بفرحة يا إلهي في محراب بيتك، وعلى العود أسبح بحمدك.
فليه يا نفسي كده حزينة ومهموم قلبي؟
فأنا توكلت عليك يا ربي، ودايمًا أحمدك لأنك بتنجيني.
44
يا رب أنت عزتنا
يا رب، آبائنا قالولنا عن عجائب قدرتك في أيامهم، وأحنا سمعنا منهم بوداننا.
بإيد قدرتك طردت شعوب وزلتهم، وجبت آبائنا ووهبت لهم أرضهم.
فآباؤنا متملكوش الأرض بسيوفهم، ومنتصروش بفضل قوتهم.
لكن أنت يا رب كنت معهم وبإيد قدرتك حاربت عنهم، ونصرتهم لأنك رضيت عنهم.
يا رب أنت الملك، وأنت ناصر شعبك.
بقدرتك هزمنا عدونا، وباسمك سحقنا خصومنا.
فاحنا مش بنتوكل على سلاحنا، وسيوفنا مش بتنصرنا.
لكن أنت يا رب اللي خلصتنا وخيبت أعدائنا.
يا رب أنت عزتنا وللأبد نحمدك من قلوبنا.
لكنك يا رب بعدت عننا، وسيبتنا نواجه أعدائنا لوحدنا فاتذلينا.
خلتنا نرتد قدام أعدائنا، فنهبوا لنفسهم كل أملاكنا.
سيبتنا نتذبح زي الغنم، وبين كل الأمم شتتنا.
(كأنك) بعتنا من غير ثمن ، ومفيش مكسب من بيعتنا.
خيبتنا قدام جيراننا، وخلتنا سخرية للي حولينا.
بقينا عبرة بين الأمم، يهزو راسهم ويستهزءو بينا.
العار بقى فوق راسنا، والخجل مغطي وشوشنا.
اللي بيسخروا مننا بيعيرونا، وهم شايفين أعدائنا بينتقمو منا.
يا رب، كل ده وقع علينا مع أننا ماخلفناش معاك عهدنا.
قلوبنا مرتدش عنك، وماضلتش عن طريقك خطوتنا.
لكنك كسرتنا وبالظلمة غطيتنا، وسيبتنا لأعدائنا يفترسونا.
يا رب أحنا ماعبدناش غيرك، ولا رفعنا لإله تاني أيدينا.
فأنت يا رب عالم بنيتنا، وأنت المطلع على اللي في قلوبنا.
زي غنم ماشيين للذبح، بنواجه الموت طوال أيامنا.
فالتفت يا رب لنا وماتغفلش عننا، وللأبد خليك معانا.
ليه يا رب تبعد وجهك عننا؟ يا رب ألتفت لشقائنا ومذلتنا.
يا رب، أنكسرت نفوسنا، ولزقت بوحل الأرض بطننا.
فعجل يا رب، وفي بوعدك وبرحمتك خلصنا.
45
نشيد عُرس الملك
قلبي بيفيض للملك بجميل الكلام، وحنشد له بلساني اللي أبدعت في كتابته الأقلام.
يا ملكنا، بين كل الناس، أبدع الله في خلقتك. الكلام اللطيف بيخرج من فمك، لأن الله للأبد باركك.
يا ملكنا الجليل، أرفع سيفك أيها المحارب العظيم.
اتقدم منصور في موكبك الجليل، وبقوة يمينك أنصر الحق والرحمة وأنشر البر والإحسان.
أضرب بسهامك الحادة قلوب أعدائك، فيسقطوا كلهم تحت رجليك.
أيها الملك المختار من الله، العدل أساس مُلكك، وللأبد باقي عرشك.
أصطفاك الله ورفعك فوق أقرانك، لأنك بتكره الظلم والعدل شيمتك.
نسيم المسك والطيب بيفوح من ثوبك، والألحان في قصورك المتزينه بالعاج بتطرب قلبك.
بنات الملوك ملك يمينك، وعروسك الملكية متزينه بالذهب واقفه بجانبك.
يا عروسة الملك شوفي واسمعي كويس، أنسي بيت أبوكي وأهلك.
لأن الملك مفتون بجمالك، وهو مولاكي وطاعته واجب عليكي.
فاهي بنات أثرياء مدينة صور قدامك بيقدمو الهدايا ويطلبون رضاكِ.
عروستك الجميلة لابسه ثوب منسوج من ذهب يا جلالة الملك.
في أبهى الثياب بتتقدم وصيفاتها العذارى علشان تتزف لك.
الفرح والسرور بيملأ كل الحاضرين في قصرك.
فربنا يوهبك ذرية تخلفك، ويمدوا عبر كل الأرض ملكك.
مجد الله على مر الأجيال اسمك، وأدام للأبد ذكرك.
46
اللهُ القديرُ معنا
اللهُ القديرُ حصنُنَا المتينُ، وفي وقتِ الضيقِ هو نعمَ المعينُ.
فمنخافش لو الأرض اتهزت، ولا لو الجبال في أعماق البحار سقطت.
ولا لو البحار هاجت، ولا لو التلال اتزلزلت.
ففيه نهر جاري بيجلب النعمة للمدينة اللي فيها بيت الله المقدس.
الله حاضر في وسطها فلا تنهار، فالله بيحفظها مع كل طلعة نهار.
الله بيدوب قلوب كل الأمم، فتسقط الممالك وتخشع الشعوب.
الله القدير معانا، ورب يعقوب حصننا.
تعالوا يا كل أمم الأرض واشهدوا عجائب صنع الله على الأرض.
فالله قادر أنه ينهي الحرب ويجلب السلام على كل الأرض. يكسر السهام ويشتت الرماح ويحرق الدروع بالنار.
والله بيقول لكم: "وقفوا الحرب وأعلموا أني أنا الله العلي فوق أمم الأرض."
الله القدير معانا، ورب يعقوب حصننا.
47
سبحوا لله ملكنا
يا كل أمم الأرض أرفعوا أيدكم وصقفوا، أهتفوا بفرحة وسبحوا لله.
أخشعوا لله العلي الجبار، فهو الملك على كل الأرض.
فالله أخضع لنا كل الأمم وجعلهم تحت سلطتنا.
فهو اللي ورثنا الأرض اللي وهبها لمختاره يعقوب جدنا.
صوت الهتاف وعزف الأبواق بيعلى لله على عرشه.
سبحوا لله ملكنا.
سبحوا بحمده ورنموا فهو مالك الملك المهيمن.
الله بيملك كل الأمم من فوق عرشه المقدس.
قادة أمم الأرض أسلموا لله العلي العظيم، وجم يسبحوا معانا الله رب إبراهيم.
48
الله يحمي مدينته
سبحان الله. يليق به التسبيح علىَ جبل قدسه وفي بيته المقدس.
بهاء جبل القدس وجلال بيتك المقدس بينشر السرور في كل الأرض من مدينة الملك العظيم.
الله في وسط مدينته وبيدافع عنها ويحميها.
ملوك جمعوا قواتهِم وجم علشان يهاجموا المدينة.
لكنهم لما شافوها فزعوا وهربوا.
أتملكهم الرعب واتوجعوا زي إمرأة ساعة ولادتها.
ومالوا زي سفن عظيمة ضربتها ريح شرقية.
اللي سمعناه عن نصر الله بنشوفه دلوقت بعيننا، فإلهنا القدير للأبد بيحمي مدينته.
واحنا هنا يا إلهنا في بيتك المقدس بنتأمل في رحمتك بينا في عهدك معانا.
يا رب لك الحمد والمجد في كل الأرض، وأنت القهار والنصر من عندك.
يفرح جبل القدس ويرضى الشعب بعدلك.
خلينا نطوف حولين مدينة القدس ونعد أبراجها.
فنشوف بعيننا قوة أسوارها، ونبلغ الأجيال اللي جايه بعظمة إلهنا.
الله إلهنا الأزلي وللأبد هو بيهدينا.
49
لا تتكلوا على ثروة الدنيا
يا كل أهل الأرض أسمعوا كويس كلامي.
أسمعوا كلكم، غنيكم وفقيركم ، كبرائكم ومساكينكم.
فبالحكمة بينطق فمي، وبالمنطق بيعبر فكري.
أسمع كلمة الحكمة بودني، وعلى ألحان الكنارة أفسر أسراري.
ليه أخاف في وقت البلاء، لما يحاوطني شرار الأعداء؟
فهم بيتكلو على غناهم، وبيتفاخر بثرواتهم الأغنياء.
فمفيش حد يقدر أنه ينجي غيره ولا يشتري نفسه من الله بفداء.
ومفيش نفس تقدر توفي ثمن الفداء.
فمين يعيش للأبد ولا يهلكه الفناء؟
فاحنا بنشوف الحكماء والجهلاء بيموتو، وبيسيبوا وراهم ثروات بياخذها الغرباء.
ورغم أنهم أمتلكوا الأرض وكتبوا عليها أسمائهم إلا أن القبور كانت مثواهم.
فالإنسان بالرغم من عظمته زيه زي الحيوان مصيره الفناء.
فدي حتكون نهاية المتكلين على غناهم، واللي بيتبعو مشورة الجهلاء.
فهم زي الغنم والموت بيقودهم لموتهم، وفي النهاية الناس بتدوس على قبورهم.
أما أنا فالله بيحفظني، ومن قبضة الموت بيخلصني.
ميغركش لو شفت الأغنياء ساكنين القصور.
فلما يموتوا لا الجاه بينفعهم ولا بيأخذون حاجة معاهم.
فبرغم أن غرور الدنيا بيلهي الناس وكلنا بنفرح بالحياة،
لكن الكل فاني والموت مصير كل الأحياء.
فالإنسان بالرغم عظمته زيه زي الحيوان مصيره فناء.
50
آضحية الحمد
الله القدير نادى في الأرض من مشرقها لمغربها.
أشرقَ جلالُ نورِ وجهِ إلهَنا مِن بيتِه المُقدسِ.
كن إلهنَا لا يصمتُ، ويحلُ في جَلالِ تتقدمُه نارُ آكلةٌ ومِن حَولِه تَهدرُ الريَاحُ.
ينادي السماوات والأرض علشان يشهدوا حساب شعبه.
ويقول: ”المتقين يحضروا قدامي، اللي عاهدوني وقدموا لي الآضاحي.“
وتعلن السماوات وتقول: ”الله هو الحكم العدل، وهو الديان صادق الوعد.“
والله يقول: ”يا بني إسرائيل، أنا هو الله إلهكم. فاسمعوا اللي شهدته عليكم.
أنا مش بعاتبكم بسبب أضحياتكم، فأنتم دايمًا بتقدمو لي الآضاحي.
فأنا الغني ومش محتاج ثيرانكم ولا كباشكم.
وأملك كل اللي في غابات الأرض من حيوان، والمواشي على سفوح التلال.
وأنا العليم بكل المخلوقات في الوديان، وبالطيور على قمم الجبال.
فأنا لا بطلب منكم ولا الجوع بيمسني، فكل الأرض واللي عليها ملكي.
فأنا لا باكل من لحوم آضحياتكم ولا بشرب دمها.
أنا هو الله العلي العظيم، ولا ترضيني إلا آضحية حمد ووفاء بنذر.
ساعتها تدعوني في يوم ضيقتكم، وأنا أخلصكم فتمجدوني.“
أما المنافق فأقول له: بأي حق تتكلم بإسم شريعتي أو تدعي أنك بتحفظ عهدي؟
فأنت عصيت أوامري وتركت شريعتي ورا ظهورك.
أخترت رفقة الأشرار، واللي مش بيحفظوا عهد الزواج الخاينين.
فمك مش بيتكلم إلا بالسوء، وبالكذب بينطق لسانك.
تمشي بين الناس بالنميمة، وبالسوء بتغتاب أخيك.
كل ده شهدته عليك، فظننت أنت أني وافقتك. سكت عنك، لكني دلوقتي أحاسبك وأدين فعلك.
فانتبهوا يا مَن نسيتوني، وإلا أهلكتكم ومفيش حد يخلصكم من ايدي.
خلوا أضحياتكم من قلوب شاكرة علشان أرضى عنها، والنجاة تكون للي يمشي على صراطي المستقيم.
51
أللهم أصلح لي قلبي
يا رب أنت اللطيف صادق الوعد فالطف بي.
وأنت الرحيم دامًا فاعفي عن ذنبي.
يا رب أغسلني من ذنبي.
ومن خطيئتي طهرني.
يا رب أذنبت وعارف ذنبي،
وذنوبي شاهدة دايمًا قدام عيني.
أنا يا ربي أذنبت في حقك، وعملت الشر لما عصيتك.
فإن عاقبتني بذنبي، فأنت العدل في حكمك.
فأنا جيت الدنيا دي وشايل ذنبي،
وخطيئتي معايا من يوم ما ولدتني أمي.
يا رب أنت مش بترضى إلا بطهارة نفسي.
فألهمني الحكمة في أعماق قلبي.
يا رب طهرني ومن الذنب أغسلني،
فيصفى ويتطهر من الذنوب قلبي.
ربي أستجب لي وأسعد قلبي،
وعافيني بعد ما كسرت عظمي.
أللهم لا تلتفت لذنوبي،
وأستر كل آثامي.
أللهم أصلح لي قلبي،
وطهر لي روحي.
أللهم لا تبعدني عنك،
ولا تنزع روحك القدس مني.
أللهم أسعد قلبي زي ما سبق ونجيتني،
قويني وأجعل روحي راضية بطاعتي.
فأعرف الخطاة طريقك،
ويتوب المذنبين إليك.
فيا منجي أعصمني من سفك الدم.
فأسبح بإسمك ويرنم لك فمي.
يا رب إلهم لساني،
فينطق بكلمات الحمد فمي.
رضاك يا إلهي،
مش بمظاهر تقديم الآضاحي.
إنما رضاك في التقوى،
والتوبة من قلب منيب.
أللهم أحسن للقدس مدينتك،
وعيد بناء أسوارها بقدرتك.
فنرجع ونقدم قرابين الشكر لك،
وأضحيات حمد تليق بعظمتك.
52
يا من تهلك الجبارين
يا جبارين، يا اللي بتتفاخرو دايمًا بخطاياكم، أعلموا أن الله مش بيخلف وعده بالرحمة لعباده المتوكلين.
أنتم بتدبرو للشر، ألسنتكم خبيثة بتؤذي زي حد السيف.
بتحبو الشر والكذب وبتكرهو الخير والصدق.
لسانكم بينقط ضرر، وكلامكم مصيدة هلاك.
لكن الله حيهدم جبروتكم، ويخرجكم من بيوتكم، ومن الأرض ينزعكم.
ولما يشوف الصالحون نهايتكم، حيقولو وهم بيسخرو منكم:
”شوفوا نهاية اللي متوكلوش على الله، وتوكلوا على جبروتهم وغناهم!“
أما أنا فزي شجرة زيتون خضراء بتنبت في بيت الله، وللأبد أنا توكلت على رحمة ربي.
يا من تهلك الجبارين لك الحمد دايمًا على صُنعك. سلمت أمري إليك وفي محضر أوليائك أسبح القدوس أسمك.
53
يا رب عجل بخلاص شعبك
يا رب، الغافلين بيقول أن مشيئتك مش بتهمهم.
بعد ما فسدوا كلهم وساءت أعمالهم.
يا رب أنت العالم بقلوب البشر،
وعارف لو فيه حكيم لرحمتك بينتظر.
لكن يا رب زاد الفساد وضل العباد،
ومفيش حد بيعمل الخير أو يرجو الرشاد.
وأنت يا رب بتقول لهم: يا غافلين،
ما لكم مش خايفين، وبتتربصوا بالصالحين؟
لكن الله حينزل الرعب في قلوبكم ويخيبكم،
ويشتت عظام جثثكم جزاء عصيانكم.
يا رب عجل بخلاص شعبك،
فنفرح بنجدتك يا رب العالمين.
54
يا رب أكفني شر أعدائي
يا إلهي نجيني، وبقدرتك دافع عني وأنصفني.
يا رب أسمع ندائي واستجيب لدعائي.
يا رب، أغراب سفاحين مش بيخافوك أجتمعوا على قتلي.
لكنك يا ربي أنت بتقويني ومن السقوط بتحفظني.
فيا رب أكفني شر أعدائي، وبحسب عهدك أهلكهم ونجيني.
وأنا يا رب حقدم لك أضحية حمد، وأسبح بإسمك اللطيف يا إلهي.
لأنك يا رب من كل كرب نجيتني، ورضيت عيني بمشهدِ هلاكِ أعدائي.
55
غدر الصديق
يا رب أسمع دعائي، ومتحجبش وجهك عني.
يا رب أستجب لي وساعدني، فأنا حيران والهم غالبني.
فأعدائي بيصرخو عليَّا وهم بيهاجموني. حاقدين عليا وبيضطهدونني.
قلبي بيرتجف جوايا، وحاسس أن الموت محاوطني.
الخوف بيهزني والفزع اتملك مني.
ياريت ليا جناحات زي الطيور، فأطير بعيد وارتاح في سلام من تعبي.
كنت هربت بعيد وخليت في البراري سكني.
أو كنت لجأت لمأوىً يحميني من العواصف اللي بتحاوطني.
فمفيش في المدينة حوليا غير الظلم والفتنة. فيا رب خيب كيد أعدائي ومتنجحش خططهم ضدي.
فهم بيطوفو ليل ونهار حولين أسوارها، وبيملوا بالشر والفساد ساحتها.
والظَلمة والمحتالين بيمرحو في شوارعها.
لو كانت الإهانة من عدوي كنت أتحملت، ولو كان الذم من غريمي لكنت هربت.
لكن اللي أهانني وذمني هو أنت يا صاحبي.
جمعتني معاك عشرة سنين، وكنا بنصلي سوا في بيت الله مع المتعبدين.
أللهم أهلك أعدائي الأشرار الظالمين، ونزلهم قبورهم أحياء مهزومين.
يا رب اسألك العون وأنت خير الحافظين.
ربي رفعت لك شكوتي، وأنت سامع صرختي طول نهاري وليلي.
فلو الأعداء حاصروني، أنت بتحفظني ومن سيوفهم بتحميني.
أللهم ذل أعدائي فهم مش بيتوبو إليك ولا منك بيخافوا، وأنت الحكم من فوق عرشك وأنت السميع لشكوتي.
يا رب، صاحبي خاني ونقض العهود.
كلامه معسول لكن قلبه حقود، ولسانه ناعم لكنه سيف ممدود.
يا رب لك خضعنا، وإليك بنشكي همومنا، وأنت يا رب مش بتخيبنا.
أما الأشرار السفاحين فبتقصف أعمارهم وبتنزلهم قبورهم. وأنا يا رب عليك توكلي.
56
نور الحياة
يا رب ألطف بيا، فأعدائي طول يومي بيطاردوني.
يا رب، كثير بيسعو ورايا وبتكبر بيهاجموني.
لكن يا رب حتى وأنا مفزوع، عليك وحدك توكلي.
لك الحمد لأنك بتحفظ وعدك وبتنجيني، وعليك وحدك توكلي. فمفيش حد يقدر يؤذيني.
يا رب، أعدائي دايمًا بيبدلوا كلامي، ومش بيفكرو إلا في أذيتي.
فهم بيرصدوا خطواتي، وبيتآمروا علشان يقتلوني.
فيا رب متسيبهمش يفلتوا من عقابك، يا اللي بتهلك الأمم العاصية في غضبك.
يا رب، أنت العليم بحالي، وأنت المُحصي لدموعي.
لما أدعي لك يا ربي، أعدائي حيتراجعوا قدامي، لأني أعلم باليقين أنك معايا.
يا رب بسبح باسمك، ولك الحمد على عهدك.
توكلت عليك يا رب فلا أخاف. فمين اللي يقدر يؤذيني؟
وأنا يا ربي حقدم لك أضحيات شكر وأوفي لك بنذري.
لأنك حفظتني من الزلل ومن الموت نجيتني، علشان أتبع نور الحياة وترضى عني.
57
أنتعشي يا نفسي.
يا ربي العلي ألطف بيا. لجأت لك يا رب فارحمني، وأنا هحتمي تحت ظل جناحك لحد ما تبعد المصائب عني.
بصرخ لك يا ربي، فتمم مشيئتك ونجيني.
وابعت لي مدد من السماء ينقذني، ويوبخ اللي بيهاجموني. فأنت الودود صادق الوعد وعليك توكلي.
يا رب، أعدائي زي أسود مفترسة بتحاوطني. سنانهم زي حد الرمح ولسانتهم سيوف مسنونة.
يا رب لك الجلال في السماوات، فخلي مجدك يعم الأرض كلها.
أعدائي نصبوا فخ علشان يوقعوني. فسقطوا في الحفرة اللي حفروها في طريقي.
يا رب أمنت بك وثابت قلبي. وأنا حرنم وأسبح لك يا ربي.
أنتعشي يا نفسي. في الفجر حقوم وأرنم على عودي.
وحسبح لك يا ربي، وحتسمع كل الأمم تسبيحتي.
وسعت رحمتك السما، وبرك غطى السحاب.
يا رب لك الجلال في السماوات، فخلي مجدك يعم الأرض كلها.
58
الحكم لله رب العالمين
يا حكام الأرض، هل فعلاً بتأمرو بالحق؟ وهل بالعدل بتحكمو بين الناس؟
لا! أنتم بتدبرو بالباطل، وبتنشرو الظلم في الأرض بأيديكم.
ضليتم عن الحق وبتتكلمو بالباطل من يوم ولادتكم.
السم بيخرج من كلامكم زي لدغة الحية،
لكنكم حيات عاصية لا بتسمع للحواة ولا بتستجيب للسحرة الماهرين.
يا رب، أعدائي زي وحوش مفترسة. فحطم يا رب سنانهم وأكسر أنيابهم.
أللهم شتتهم زي الماء المسكوب، وأكسر رماحهم فما تصيبنيش.
أللهم أسحقهم زي الحشرات الزاحفة، وزي الجنين الميت اللي ماشفش النور.
أللهم أحرقهم زي الحطب في النار تحت القدور.
فيفرح الصالحين لما يشهدوا جزاء الظالمين، ويغسلوا رجليهم بدم أعدائهم.
فيعرف كل الناس أن الله مش بيضيع أجر المحسنين، وأن الحكم لله رب العالمين. (إِنَّ اللَّهَ لَا يُضِيعُ أَجْرَ الْمُحْسِنِينَ ﴿١٢٠ التوبة﴾ (إِنِ الْحُكْمُ إِلَّا لِلَّهِ يَقُصُّ الْحَقَّ وَهُوَ خَيْرُ الْفَاصِلِينَ ﴿٥٧ الأنعام﴾
59
يا ربي وقوتي
يا رب أحفظني، ونجيني من أعداء بيحاربوني.
واعصمني من أعداء سفاحين عايزين يقتلوني.
أعداء قاسين بيتربصو لقتلي، ومن غير ما أغلط في حقهم بيتآمرو ضدي.
يا رب أنا برئ، لكنهم بسرعة هاجموني. فأنظر لحالي، عجل وساعدني.
يا رب أنت القهار. عاقب الأمم العاصية وماترحمش المجرمين.
فهم بيخرجو في الليالي، يمشوا في المدينة وينبحوا زي الكلاب.
يسبوا ويلعنوا وبألسنة حادة يتكلموا، ويقولوا "مفيش حد يعلم بينا".
لكنك يا رب بتسخر منهم وبتهزأ من كل الأمم العاصية.
يا رب أنت حصني، وعليك توكلي.
يا رب أنت اللطيف بيا، فخليني أشوف هزيمة أعدائي.
يا رب أنت حصننا، فلا تفنيهم فورًا وشتتهم بقدرتك، علشان يكونوا عبرة وماينساش شعبك.
أللهم جازهم على كذبهم وخطايا كلامهم، وخليهم يسقطوا في غرورهِم.
يا رب أظهر سخطك، أهلكهم ومتبقيش منهم بقدرتك. فتعرف كل أمم الأرض أنك المعين لشعبك.
فهم بيخرجو في الليالي، يمشوا في المدينة وينبحوا زي الكلاب.
ينبشوا عن الطعام. إذا مالقوش يصرخوا، وإذا لقوا مش بيشبعوا.
أما أنا يا رب، فحسبح لك دايمًا وابتهج بمحبتك. فأنت يا رب حصني، وفي وقت الكرب أنت ملجأي.
سبحانك يا ربي وقوتي، أنت الودود وأنت حصن حمايتي.
60
مفيش حد غيرك ينجينا
يا رب ألطف بينا ولك ردنا. بعد ما غضبت علينا، وسيبت أعدائنا يدمروا مدننا.
اتزلزلت الأرض وانشقت تحتنا، فثبتها تحت رجلينا واجبر كسرنا.
نزلت البلاء بينا، وسقيتنا كأس عقاب طوحت راسنا.
وعطيت اللي بيتقوك علامة تنجيهم من سهام أعدائهم.
يا رب أستجب لنا، نجي اللي بيتقوك وبقدرتك أنصرنا.
يا رب انت وعدتنا بأنك تنصرنا على أعدائنا.
فيا رب، مَن غيرك حيقودنا علشان نقتحم حصون مُدن أعدائنا؟
وأنت غضبت علينا، ومش بتحارب مع جيشنا.
فيا رب ساعدنا على أعدائنا، فمفيش حد غيرك ينجينا.
يا رب احنا واثقين أنك حتنصرنا وتهلك أعدائَنا.
61
من أقصى الأرض دعيتك
يا رب أسمع صرختي، واستجب دعوتي.
أنقطع أملي، ومن أقصى الأرض دعيتك. فاهدني لصخرة عالية في حصنك.
يا رب أنت حصني المتين، وأنت ملجأ يحيمني من عدوي.
يا رب خليني أعيش للأبد في حرمك، واحتمي تحت ظل جناحك.
فأنت يا رب سمعت نذوري وباركتني، زي ما باركت كل اللي بيعظمو أسمك.
أللهم بارك في عُمْر الملك اللي أخترته، وديم عبر الأجيال ملكه.
أللهم ثبت عرشه دايمًا قدامك، وتولاه بإحسانك ومحبتك.
يا رب، دايمًا بسبح بإسمك، وعلى مدى أيامي أوفي باللي نذرته لك.
62
أطمئني يا نفسي
يا رب أنتظرك بصبر، وأنت وحدك القادر على نجدتي.
يا رب أنت ملجأي وحصني، وبك أنا ثابت لأنك بتحفظني.
حاسس أني حيطة مايلة أو سور على وشك الإنهيار، أعدائي بيهاجموني وبيسعو لهدمي.
بيتآمرو على سقوطي من سمو مقامي. بيحبو الكذب، بينافقو بلسانهم والكراهية ساكنة قلوبهم.
أطمئني يا نفسي. فأنا صبرت وتوكلت على ربي.
يا رب أنت ملجأي وحصني، وبك أنا ثابت لأنك بتحميني.
يا رب أنت بتحفظني وتكرمني، وأنت ملجأي الحصين اللي بيأويني.
يا مؤمنين اتوكلوا على الله في كل حين. فالله هو ملجأنا وهو المعين.
فما الإنسان إلا نسمة فانية ومفيش حد يعظم على الله. فالعظيم والحقير سواء مجرد نفخة هواء، إذا اتحطت على الميزان لا تزن شيئًا.
ماتغتروش بالقوة، ولا تتفاخروا بالنهب، ولا تتوكلوا على الثروة.
فإن العزة لله جميعًا، زي ما قال الله عن نفسه.
وإن الله هو اللطيف، وهو بيجازي كل إنسان بحسب عمله.
63
تحت ظل جناحك
يا رب أنت إلهي، ولا أعبد إله غيرك. أرجو وجهك، وتشتاق نفسي إليك شوق العطشان لغدير المياة في الصحراء الخالية.
يا رب، في بيت عبادتك، أشهد مجدك وقدرتك بنفسي.
يا رب بسبح لك، فرحمتك خير من حياتي.
وطوال حياتي حسبح لك، وأرفع لك بالدعاء ايدي.
بتشبعني وعلى وليمة بتضايفني. وأنا بتسبيح حمدك لساني يغني.
يا رب، لما أرقد في فراشي، بفكر في رحمتك طول ليلي.
فأنت يا رب كنت في عوني، وأنا تحت ظل جناحك أفرح وأغني.
متعلقة بك نفسي، ويد قدرتك بتساندني.
أللهم نزل في بطن الأرض كل اللي بيسعو لقتلي.
أللهم جري السيوف على رقابهم، وفريسة للوحوش أجعل نهايتهم.
يا رب أنت بتخرس ألسنة الكذابين. أما أنا فبك يا رب بفرح مع عبادك المؤمنين.
64
بصنع الله يفرح الصالحين
يا رب أسمع شكوتي واحفظ حياتي من تهديد عدوي.
أحميني من كيد الأشرار ومكر الظالمين.
ألسنة أعدائي مسنونة زي السيوف، وبيوجهو كلام مر زي السهام،
بيستخبوا ويطلقوها بلا رحمة على الأبرياء.
بيشجعو بعضهم على الشر، وبيقولوا في سرهم: ”يلا ننصب الفخاخ، فمفيش حد يعلم بنا.“
وبيدبرو المؤامرات، ويقولو: ”بدهاء بندبر خططنا ومحدش يعرف نوايانا.“
لكن الله حيفاجئهم ويضربهم بسهامه ويصيبهم.
وحيخلي لسانهم سبب هلاكهم. فيرتجف من الخوف كل اللي يشهد زوالهم.
ويخشع الناس لله، ويتفكروا في عجائب أعماله، ويبلغوا غيرهم.
بصنع الله يفرح الصالحين اللي بيلجأو لله بقلوب مخلصة.
65
يا رب أنت الأمل لكل البشر
يا إلهنا، أنت تستحق تسبيحنا وعلى جبلك المقدس نوفي لك بنذورنا.
يا رب كلنا بنتوجه لك لأنك بتستجيب دعواتنا.
ثقلت ذنوبنا لحد ما غطتنا، ومفيش غيرك حد يعفي عن ذنوبنا.
فهنيالنا لأنك اخترتنا وفي جوار حرمك سكنتنا ومن خيرات بيتك كفيتنا.
فأنت يا رب اللي بينقذنا، وبمعجزات قدرتك وإنصافك بتستجيب لنا. يا رب أنت الأمل لكل البشر في كل أطراف الأرض وجُزر البحار.
يا رب العزة ردائك، وأرسيت الجبال بقدرتك.
بقدرتك بتسكن أمواج البحار الهادرة، وبتخمد هيجان الشعوب النافرة.
سكان كل الأرض يخشعو لمعجزاتك، ومن مشرق الأرض لمغربها يهتفو بتسبيحك.
بتكفل الأرض وبتنزل غيثك عليها فتخرج ثمارها رابية. أنهارك ما تجف أبدًا. يا مَن تكفي قوت كل الناس بالوفرة بحسب رحمتك.
بتمهد الأرض وتروي الحقول بفيض المطر وتبارك محاصيلها.
باركتنا بمحصول وفير، ومن فيض خيراتك شبعتنا.
اخضرت المراعي البور، وأتكست الجبال بالسرور.
اتملت الحقول بالقطعان، والغلال فاضت في الوديان. والكل يهتف بالتسبيح لك يا رب العالمين.
66
مجدي الله يا كل شعوب الأرض
يا كل أهل الأرض أهتفوا لله بالتسبيح.
سبحوا بإسمه المجيد، وعظموه بالثناء والمديح.
أهتفوا لله وقولوا: ”يا رب، ما أعظم صُنعك! يركع أعدائك قدام جلال قدرتك.
كل أهل الأرض بيسجدو لك، بيحمدوك ويسبحو بإسمك.“
تعالوا وشوفوا العجائب اللي عملها الله معانا.
فهو الذي شق البحر لنا. فعبر على قاعه الجاف آبائنا، وهناك أحتفلنا بخلاصنا.
لله الحكم للأبد بجلال قدرته، وهو البصير بكل الأمم. فمتتمردوش على الله يا متكبرين.
مجدي الله يا كل شعوب الأرض واهتفي بالتسبيح لإلهنا.
فهو اللي ثبت أقدامنا وحفظ من الموت حياتنا.
يا رب، أنت أبتليتنا وزي ما تنقىَ الفضة بالنار نقيتنا.
قدرت لنا أننا نقع في الآسر، ورميت حمول ثقيلة على ظهورنا.
خليت أعدائنا يدوسوا على رؤوسنا، وفي وسط الأهوال دخلتنا. لكنك نجيتنا ولأرض كلها خيرات وصلتنا.
وأنا يا رب حدخل بيتك وأقدم قربان من أفضل الآضاحي، علشان أوفي لك باللي نذرته في أهوال شدتي.
فيا عباد الله تعالوا واسمعوا، فأقولكم عن اللي عمله الله علشاني.
وسط اهوال شدتي، رفعت لله بالدعاء صوتي وسبحته بلساني.
لو كنت أسأت الظن في ربي، مكانش استجاب لدعائي.
لكن الله سمعني واستجاب لدعوتي.
فتبارك الله اللي استجاب لي، ومقطعش رحمته عني.
